*مجبور احب
رُغم العداوات والحرب
رُغم القساوة الفي الدرب
رُغم العزاب رُغم الضرب
رُغم الرفع رُغم النصب
رُغم الكلام ما بتعرب
مجبور احب
حُبك بذيد ما ضاق نزول
حابيك قريب الستة حول
فيهن شبع بنقو وكحول
وفيهن قريت كل الفصول
لي منهجك فوق الاصول
وعارف كمان صعب الوصول
للحب كمان ما جابرني زول
جابرني بس ليك القلب
مجبور احب
مجبور اكوس ليك في القصيد
يا زول ملاك ياخ ولا صيد
ما شوقك انت في الوريد
داير الزمن من تاني يعيد
والدنيا افرح بيها عيد
وانا وانت في الاحلام بعيد
نتلما لي يوم الوعيد
بس القدر لا زال عنيد
حاكمني بالموت والصلب
مجبور احب
مجبور احب يا زحزحه
وداير اشوفة والمحه
وخايف تغير ملمحه
وخايف يكون حبي اتمحي
ولو شفتها ساكت قريب ليك انصحه
وقول ليها دمعتو ما بتجف وغيرِك محال البمسحه
وقلبو بينزف وما بقيف والجتة دمو بِوشِّحه
ومتلك محال يلقالو زول لا في الشرق لا في الغرب
مجبور احب
سالني مرة حالك كيف
قلت ليهو اسأل بس واقيف
حالي حال في النار وضيف
عايم وما لاقيلي قيف
في صحراء لا ضل لا صريف
نص النهار والدنيا صيف
لا زول بِمُر لا حتي طيف
مطعون كمان من الف سيف
بس ليك وحاتك ما بسب
مجبور احب
مجبور اغنيلك واقول
مجبور ادق كل الطبول
ما انت لي ياخ احلي زول
شان الالم منك يزول
بمنع صهيل كل الخيول
بهدم وحاتك عفراء مول
بهزم جيوش روم والمغول
بدعي المطر فوقك هطول
بدعيلو بي شان الرسول
وبعد دا كلو فوقك بقول
وما بهمني الكون كان خرب
مجبور احب
رضيان وحاتك بالقدر
وعارف حياتي انا في خطر
لكنو كيف تاني النزول
السكه ما سكة قطر
بمشي واقدل ما بقيف
لا لي شمس لا لي مطر
ارجاني مرة علي الرصيف
من فرقتك قلبي انشطر
رابطو بشرياني و وريد
وبي قيدك ات مكروب كرب
مجبور احب*
.
.
.
# *_ودالمشايخي_*